За убав крај: Македонија атакува на победа против Фарски Острови

Фудбалската репрезентација на Македонија денеска (15 часот) го игра последниот натпревар од Лигата на нации. Првото место е веќе освоено, но потребна е победа за да останеме во игра во разигрувањето за мундијалскиот бараж преку ЛН, а секако и за убав крај на овој одличен циклус.

Фарски Острови е единствената селекција која успеа да извлече реми (1-1) против Македонија во овој циклус, па и тоа е дополнителен мотив за триумф на денешниот дуел на Арената „Тодор Проески“.

„Фарски Острови покажаа дека во денешниот фудбал нема аутсајдери и се квалитетен тим. Во овој циклус од Лигата на нации тие играат добро, се работи за дисциплинирана екипа, одговорна и доста силна, тркачки одлично подготвена. Нè очекува уште потежок меч од тој со Летонија во четвртокот. Фокусот ни е на нас самите, како ќе изгледаме на теренот и да го завршиме ова издание на најдобар можен начин. Прашањето за првото место е решено, ама ние си имаме свои мотиви, индивидуални и како тим. Си поставивме уште една цел, со што е можно повеќе бодови да бидеме поконкурентни во завршната ранг-листа за тој евентуален мундијалски бараж“, вели селекторот Благоја Милевски ви пресрет на денешниот меч со Фарски Острови.

Александар Трајковски е исто така оптимист и верува дека Македонија ќе успее да стигне и до петтата последовна победа во Лигата на нации.

„Секогаш сакаме да го дадеме најдоброто од себе и наша цел е со победа да го завршиме ова издание во Лига на нации. Треба да бидеме фокусирани и доколку го дадеме максимумот сметам дека може да ја оствариме целта и да ги освоиме трите бода”, истакна Трајковски.

Мечот меѓу Македонија и Фарски Острови се игра денеска од 15 часот на Националната арена „Тодор Проески“, убава можност љубителите на фудбалот да дојдат на стадион и да ги поздрават фудбалерите за успесите во Лигата на нации.