МАКФУДБАЛ во Рига,
Фудбалската репрезентација на Македонија оствари убедлив триумф над Летонија (0-3) во третиот меч од Лигата на нации. Атанасов, Ќамили и Елмас беа стрелци на головите, а селекторот Благоја Милевски повторно мораше принудно да менува во одбраната откако се повреди Висар Муслиу.
Во еден дел од мечот и Фисник Алими, кој е играч за врска, мораше да застане на централната стоперска позиција.
„Најважно е што ги освоивме трите бода. Почнавме добро, дадовме гол во првото полувреме, а имавме шанси и за уште неколку. Во второто постигнавме уште два и најважно е што не примивме гол. Оваа победа беше многу важна за нас, бидејќи сите знаеме како загубивме два бода против Фарски Острови. Сега одиме во Ерменија по нова победа.
Се надевам дека Висар е добро и дека ќе може да игра со Ерменија, за мене тој е топ играч, а јас сум тука да помогнам во репрезентацијата на која било позиција“, изјави Алими.
Македонија во следното коло го игра најважниот меч во групата, против директниот конкурент за првата позиција, селекцијата на Ерменија во Ереван.
