Илјадници луѓе денеска присуствуваа на погребот на легендарниот италијански фудбалер Салваторе “Тото” Скилачи во Палермо, кој почина на 60-годишна возраст. Погребот се одржа во главната катедрала во Палермо. И покрај тоа што Скилачи никогаш не играл за клуб од тој град, тој беше роден и израснат таму. По завршувањето на својата кариера, отвори младинска фудбалска академија во Палермо.
На неговиот ковчег беа поставени дресови од Италија и од Палермо, како и шалови од клубовите за кои играл — Месина, Јувентус и Интер. Кариерата ја заврши во јапонскиот клуб Џубило Ивата во 1999 година.
Катедралата можеше да прими илјада луѓе, но уште неколку илјади го исполнија плоштадот пред неа. Многумина го скандираа неговото име и аплаудираа кога ковчегот беше внесен и изнесен од катедралата.
Ковчегот го носеа неговите двајца браќа и внукот Франческо Ди Маријано, кој игра за Палермо и ја има поминато академијата на својот чичко.
На погребот присуствуваа бројни поранешни фудбалери и соиграчи, како и претставници на Италијанската фудбалска федерација. ФИФА испрати венец со пораката: „Херојот на Италија ’90“.
Скилачи беше најдобар стрелец на Светското првенство во 1990 година со шест голови и беше прогласен за најдобар играч на тоа првенство.
За италијанската репрезентација одигра 16 натпревари и постигна седум голови.
