Дербито меѓу Шкендија и Струга Трим Лум е одложено, па во фокусот на денешното второ коло од Првата фудбалска лига ќе биде пресметката меѓу Вардар и Шкупи. Двете екипи доживеаја порази на стартот, Вардар загуби од Брера во Струмица со 1-0, а Шкупи токму на стадионот „Борис Трајковски“ каде ќе игра и денеска, беше поразен од Работнички со 3-1.
Шкупи е во трансформација, доведе три нови засилувања изминатата недела, но и ги продаде Реналдо Цефас и Валид Хамиди. Можеби ќе треба малку време за да профукционира новиот напад со Армин Хоџиќ, Нилтон Родригез и Луан Абази.
Вардарци конечно ги регистрираа сите странци, Матеус, Педрињо и Алберт, па тренерот Бобан Грнчаров ќе има многу поголем фонд за избор на тимот на денешното дерби. Секако, можеби и најголемата сила на Вардар ќе дојде од трибините, каде „Комити“ се организираат за да дадат огромна поддршка на тимот.
Интересно ќе биде и во Кратово. Работнички зеде залет по триумфот над Шкупи, а дефанзивецот Егзон Белица порача дека „романтичарите“ сакаат три бода и од Кратово.
„Триумфот над Шкупи ни даде елан, работевме добро изминатава седмица и се надеваме дека во таков ритам ќе продолжиме и на денешниот натпревар против Силекс. Го респектираме ривалот, не е лесно да се освојат бодови во Кратово, но овој тим на Работнички има квалитет и сила да го стори тоа. Подготвени сме за надигрување и се надеваме на позитивен резултат“, изјави Егзон Белица.
АП Брера Струмица ја пречекува Воска Спорт и после триумфот над Вардар посакува и втор успех.
Гостивар на домашен терен го пречекува Тиквеш, а Македонија ЃП во Ѓорче Петров ќе биде домаќин на Брегалница.
ПРВА ФУДБАЛСКА ЛИГА – 2. КОЛО (денеска, 17 часот)
ВАРДАР – ШКУПИ
СИЛЕКС – РАБОТНИЧКИ
АП БРЕРА – ВОСКА СПОРТ
ГОСТИВАР – ТИКВЕШ
МАКЕДОНИЈА ЃП – БРЕГАЛНИЦА
ШКЕНДИЈА – СТРУГА ТЛ (30.август)
