Македонскиот првак Шкендија утре (18.45 часот) на Националната арена „Тодор Проески“ го пречекува тимот на Шелбурн од Република Ирска.
Тренерот на Шкендија, Јетон Беќири, на денешната прес-конференција ги сподели своите очекувања од претстојниот меч.
„Имавме доволно време да се подготвиме. Во Скопје одигравме добро и во квалификациските мечеви во Европа. Иако сме различни по стил со противникот, посакувам со добра и паметна игра да дојдеме до победа. Направивме детална анализа на Шелбурн — на ова ниво не можеш лесно да најдеш слабости кај противникот. Мора да одиграме квалитетно. Се надеваме на добра игра, поддршка од публиката и освојување на трите бода“, изјави Беќири.
Тој се осврна и на првиот настап на Шкендија во Конференциската лига, каде тимот убедливо загуби на гостувањето кај Рајо Ваљекано.
„Пред да играме со Рајо знаевме дека шпанската лига е многу силна, но кога ќе излезеш на терен против тие екипи, уште повеќе ја чувствуваш таа разлика. Видовме како се игра модерен фудбал и не е случајно што шпанските тимови секогаш се на врвот. Сите ние видовме што значи врвен и современ фудбал. Се надевам дека научивме нешто од тој натпревар и дека тоа искуство ќе ни помогне во иднина,“ додаде Беќири.
