Фудбалската репрезентација на Македонија би можела да игра пред 24.000 гледачи на двата први натпревари на Европското првенство. Ова откако Романската фудбалска федерација побарала од министерството за здравство на државата да издаде дозвола за двојно повеќе гледачи на Националната арена во Букурешт. Засега се гарантирани 12.300 гледачи, односно 25 отсто од капацитетот на Националната Арена во Букурешт.
„Романската федерација поднесе предлог-барање до министерството за здравство, за да се зголеми на лимитот за гаранција на дозволен капацитет на 50 отсто“, изјави Георге Попеску, легендарниот романски репрезентативец кој е дел од организацискиот одбор за ЕВРО во Букурешт.
УЕФА остави рок рок до 28 април сите градови да се изјаснат за вкупниот капацитет на стадионот, со оглед дека има градови каде може да има и зголемување на бројот на фановите. Меѓу нив веројатно е и Букурешт.
