Фудбалската репрезентација на Македонија вечерва (20.45 часот) има посебен испит. Големо искушение ги очекува избраниците на селекторот Игор Ангеловски на дуелот против четирикратниот светски првак Германија во Дуисбург. Тоа е трет меч од квалификациите за СП 2022 во Катар, а нашите репрезентативци доаѓаат по убедливиот триумф (5-0) над Лихтенштајн.
Еден од оние кои блескаа против Лихтенштајн беше Александар Трајковски. Напаѓачот на Мајорка беше стрелец на два гола и заслужи место во најдобриот тим за втората рунда од квалификациите.
Очекува дека ќе биде стартер и на вечерашната голема пресметка против Германците, а пред неа порача:
„Постави ги целите високо и не запирај додека не ги достигнеш. Вечерва не очекува голем меч“, истакна Трајковски.
Натпреварот меѓу Германија и Македонија е закажан за 20.45 часот на „МСВ Арена“ во Дуисбург.
