Капитенот на фудбалската репрезентација на Македонија, Енис Барди, се подготвува со националниот тим за пресметките со Летонија и со Фарски Острови во Лигата на Нации, но дојде изненадувачка вест од Турција. Неговиот клуб Трабзонспор одлучи да го префрли во вториот тим, наводно со цел да ги подобри своите перформанси.
Сепак, јасно е дека клубот прави притисок за да потпишат нов договор или да се одлучат да заминат во јануари, за да не бидат слободни агенти во летниот преоден рок.
„Како резултат на денешниот состанок меѓу претседателот Ертугрул Доган, потпретседателот Зејат Кафкас и тренерот Шенол Ѓунеш, одлучено е нашите фудбалери Мислав Оршиќ, Стефано Денсвил, Енис Барди и Умут Бозок да тренираат одвоено за да ги подобрат своите перформанси“, се вели во соопштението на Трабзонспор.
Барди, кој во Трабзонспор е од 2022 година, сезонава забележа вкупно 13 настапи во сите натпреварувања за тимот, од кои осум во турското првенство.
