Фудбалерот на Пари Сен Жермен, Oсман Дембеле, на емотивен начин му оддаде почит на трагично починатиот Диого Жота, кој загина во сообраќајна несреќа. Францускиот репрезентативец го направи тоа веднаш по постигнатиот гол против Баерн Минхен, во четвртфиналето на Светското клупско првенство.
Дембеле влезе како замена и во последните моменти од натпреварот го постави конечниот резултат од 2-0, со што ПСЖ обезбеди пласман во полуфиналето.
По голот, тој седна на тревата, ги скрсти нозете и го имитираше препознатливиот начин на прослава на Жота – движење со рацете како да држи џојстик, алудирајќи на гејмерската пасија на покојниот Португалец.
Овој гест на Дембеле предизвика многу емоции на трибините и на социјалните мрежи, каде фановите го пофалија за покажаната почит и човечност.
