Легендата на Рома и светски шампион со Италија од 2006 година, Франческо Тоти, изјави дека сочувствува со Кристијано Роналдо, кој минува низ најтешкиот период во кариерата. Португалската ѕвезда е без клуб откако го напушти Манчестер Јунајтед и остана на клупата на Мундијалот против Швајцарија и Мароко.
„Гледајќи што се случува со Роналдо во последните неколку месеци, се враќам на она што го чувствував. Мислам дека треба да добие поголема почит. Знам како се чувствуваш кога веќе не си на врвот, а си бил таму долго време“, прокоментира Тоти.
Принцот од Рим се уште не сакаше да заврши со фудбалот и влезе во конфликт со тренерот Лучијано Спалети, а раководството на Рома не му понуди нов договор.
„Освојувањето на светската титула е нешто што останува со вас до крајот на животот. Мислам дека италијанската селекција од 2006 година сигурно ќе беше меѓу полуфиналистите на тековното Светско првенство“, истакна Тоти.
„Меси и Марадона? За мене Марадона е фудбал. Меси е најдобриот фудбалер во моментов, но сепак е зад Диего“, изјави Франческо Тоти.
