Тотенхем официјално го претстави своето најново засилување, Чави Симонс. Холандскиот офанзивен играч за врска пристигна од Лајпциг за сума од 51 милион фунти.
22-годишниот Симонс цело лето беше силно поврзуван со Челси, па дури и постигна договор за личните услови, но Тотенхем ги забрзаа преговорите и успеаја да го обезбедат неговиот потпис, особено по неуспешниот обид да го донесат Еберечи Езе, кој на крајот се одлучи за Арсенал.
Симонс потпиша петгодишен договор, со можност за продолжување на уште две години. Тој е седмото ново засилување на Тотенхем ова лето, во кое клубот вложи над 170 милиони фунти за трансфери. На „Вајт Харт Лејн“ ќе настапува со дресот со број „7“.
„Навистина сум среќен и едвај чекам да започнам. Ова е сон кој одамна го посакував. Клубот е одличен, а кога се сретнав со тренерот, веднаш почувствував дека ова е вистинското место за мене. Сакам да дадам сè од себе и за тимот и за навивачите“, изјави Симонс за клупската страница.
Менаџерот Томас Франк исто така беше задоволен од трансферот.
„Драго ми е што успеавме да го донесеме Чави Симонс, тоа е огромно засилување. Иако е млад, веќе има искуство и покажа квалитети на највисоко ниво. Може да игра како класична ‘десетка’, но и како крило, има визија, голови и асистенции. Убеден сум дека ќе се вклопи одлично во тимот кој веќе напорно работи“, изјави менаџерот на Тотенхем.
