Јувентус размислува за опции за тренерската клупа за следната сезона, а меѓу имињата кои повторно се во игра е Игор Тудор. Додека Тијаго Мота сè уште е главниот избор на управата, клубот подготвува алтернативни сценарија, при што хрватскиот стратег е сериозна опција, пренесуваат италијанските медиуми.
Игор Тудор е без работа од ноември минатата година, кога ја напушти Лацио по кратката епизода на чело на клубот. Претходно го водеше Олимпик Марсеј, а својата тренерска кариера ја градеше во Хајдук, како и во грчки и турски клубови. Јувентус добро го познава, не само како поранешен фудбалер, туку и како поранешен тренер.
Тудор беше помошник на Андреа Пирло во сезоната 2020/21, каде што беше задолжен за тактичките сегменти, вклучувајќи ја подготовката на одбраната и транзицијата во напад. Според „Газета дело Спорт“, Мота ќе добие уште една шанса пред да се донесе конечна одлука, а таа шанса ќе ја има за осум дена, кога Јувентус ќе биде домаќин на Џенова.
Тудор не се плаши од конкуренцијата за тренерската позиција и „би бил подготвен веднаш утре да дојде во Торино“, наведува „Газета“. Тој би сакал и договор за следната сезона. Како најголем конкурент на Тудор во случај на заминување на Мота се споменува Роберто Манчини. Неговата последна работа беше селекторската позиција на репрезентацијата на Саудиска Арабија, а има големо искуство и во Серија А.
