Фудбалерот од средниот ред на Ливерпул, Тијаго Алкантара, наскоро би можел да се врати во својот роден клуб Барселона, пишуваат медиумите во Шпанија. Фудбалерот од средниот ред сѐ уште нема запишано минутажа за „црвените“ од почетокот на сезоната во Премиер – лигата поради постојаните повреди кои го мачат.
Менаџерот на Ливерпул, Јирген Клоп, изрази надеж дека Тијаго, сепак, ќе може да се опорави за време на репрезентативната пауза до 21 октомври.
И тогаш, сепак, Тијаго Алкантара најверојатно нема да има стартно место во тимот на Клоп. Се чини дека тој ќе биде неговиот трет избор по летните пристигнувања на Доминик Шобошлаи и Алексис Мекалистер.
Договорот на Алкантара со Ливерпул истекува на крајот од сезоната и во моментов нема изгледи за негово обновување. Тоа значи дека во следното лето, Тијаго ќе биде слободен агент.
