Менаџерот на Манчестер Јунајтед, Ерик тен Хаг, беше многу разочаран по ремито против Севиља (2-2) во првиот меч од четвртфиналето во Лигата на Европа. Англискиот клуб водеше со 2-0, но во последните минути домашните фудбалери си постигнаа два автогола.
„Натпреварот беше во наши раце. Водевме со 2-0 и требаше да постигнеме трет, па дури и четврти гол. Сè беше до нас, но неколку принудни промени ни ги расипаа плановите. Рафаел Варан се повреди, а Антони Марсијал долго време не беше во стартниот состав и не издржа 90 минути. Го заменив и Бруно Фернандеш, но затоа што имаше жолт картон“, објасни Тен Хаг.
„Постепено ја загубивме контролата над играта. Потоа дојде повредата на Лисандро Мартинез, која не остави со 10 играчи на теренот. Лоша среќа е што си постигнавме два автогола, но мора да прифатиме дека такви работи се случуваат“, изјави Холанѓанецот.
За Ерик Тен Хаг ова беше натпревар број 50 на чело на „црвените ѓаволи“. Неговиот ефект вклучува 35 победи, седум нерешени натпревари и осум порази.
