Македонскиот репрезентативец Столе Димитриевски за шпанските медиуми откри дека не би имал ништо против и до крајот на кариерата да го носи дресот на шпанскиот прволигаш Рајо Валјекано. Тој пред две години се поврзуваше и со трансфер во Барселона, но откако комплетира дури пет сезони во Рајо и одигра 150 натпревари за клубот, вели дека би потпишал и доживотен договор со Рајо.
Столе Димитриевски вели дека се чувствува максимално ценет и почитуван во клубот.
„Им кажав во клубот дека сакам да останам и ако треба да потпишам договор до 2029 година, ќе го сторам тоа. Ако треба да потпишам договор до почетокот на тренерска кариера – ќе го сторам тоа. Ако треба да останам до крајот на животот, немам проблем. Овде сум почитуван, ми дадоа шанса, а јас се трудам секогаш да до дадам најдоброто од себе за клубот. Штотуку собрав 150 настапи за Рајо и би сакал уште 300. Навивачите, клубот, тие ми ја дадоа љубовта поради која јас се идентификувам со Рајо Валјекано“, изјави Столе Димитриевски.
Рајо Валјекано и Столе Димитриевски утре ги очекува дуел со Реал Мадрид на „Сантијаго Бернабеу“.
