Стефано Пиоли, актуелниот тренер на Ал-Наср, е подготвен да го напушти клубот од Саудиска Арабија за да се врати во Италија и повторно да го преземе кормилото на Фиорентина, јавуваат италијанските медиуми.
Пиоли го презеде тимот на Кристијано Роналдо во септември минатата година, но поради неуспешната прва сезона, разделбата изгледа неизбежна. Првично се шпекулираше дека 59-годишниот стратег ќе го наследи Џанпјеро Гасперини во Аталанта, но според најновите информации, преговорите со Фиорентина биле поуспешни. Тој треба повторно да седне на клупата на „Артемио Франки“, каде што веќе беше тренер од јули 2017 до април 2019 година.
Пиоли, кој освои титула со Милан во 2022 година, ќе го замени Рафаеле Паладино, кој доброволно се повлече од функцијата. Според „Скај Италија“, токму Пиоли е посакуваниот тренер на Фиорентина, а тој веќе дал согласност да го преземе клубот.
Се очекува неговиот договор да биде на две или три години, но официјалниот почеток на неговата работа во Фиренца ќе се случи дури во втората половина на јули. Причината е што треба да остане во Ал-Наср најмалку до 15 јули за да може да ги искористи даночните поволности од својот високо платен договор во Саудиска Арабија.
