Атлетико Мадрид синоќа по 11. пат стана шампион на Шпанија откако со 2-1 го совлада Валјадолид на гостински терен и го сочува првото место на табелата во Ла Лига пред Реал Мадрид. Тренерот Диего Симеоне вели дека ова е најголема награда за тешката сезона, а титулата им ја посвети на многу драги луѓе кои не се веќе меѓу живите поради коронавирусот.
„Среќен сум поради многу луѓе, неверојатни чувства надоаѓаат после една ваква тешка година. Многу луѓе веќе не се со нас поради коронавирусот, трофејот им го посветуваме на нив. Светот минува низ многу тажен период и се надевам дека ние донесовме барем малку радост на нашите фанови. Да се биде на првото место 32 кола во Ла Лига е нешто навистина посебно, мислам дека апсолутно заслужено ја освоивме титулата“, изјави Диего Симеоне.
Атлетико Мадрид ја заврши сезоната со 86 бода, на втората позиција е Реал Мадрид со два бода помалку, а на третата позиција се пласира Барселона со 79 бода.
