Шпанија е првиот полуфиналист на Европското првенство откако ја елиминираше домашната селекција на Германија со 2-1 по продолженија на фантастичниот дуел во Штутгарт. Микел Мерино се покажа како „златна резерва“ на Луис де ла Фуенте погодувајќи ја мрежата на Мануел Нојер во 119.минута.
Тој одлично реагираше на нафрлувањето од левата страна и со удар со глава погоди на вистинското место.
Шпанија прва дојде во водство на оваа четвртфинална пресметка, со голот на Дани Олмо во 51.минута. Тој стрелаше откако Ламин Јамал одлично го пронајде во шеснаесетникот на Германците.
Германија по примениот гол тргна во офанзива, Никлас Фулкруг го погоди дирекот, а Флоријан Вирц во 89.минута успеа да израмни и да го одведе мечот во продолженија.
Дани Карвахал во 120.минута доби црвен картон.
Сепак, на крајот се радуваа Шпанците, а Тони Крос ја завршува својата блескава кариера после овој натпревар.
