Connect with us

Шкендија и Шкупи славеа, ама и Вардар победи против Академија Пандев

Шкендија славеше против Струга Трим Лум со 2-0 на домашен терен и стигна до првиот триумф во новата сезона. Славеше и Вардар на гости против Академија Пандев во Струмица,  а погодокот беше постигнат од пенал. Успешен реализатор на најстрогата казна беше искусниот Дејан Блажевски во 77.минута.

Дејан Димов го фаулираше Матеј Цветаноски во шеснаесетникот, судијата Смоквоски покажа на белата точка, а Блажевски погоди за победа. Од 62.минута, Академија Пандев играше со играч помалку поради исклучувањето на голманот Марко Алчевски, кој заработи два жолти картони. Во 90.минута, исклучен беше и Јован Попзлатанов.  

Шкендија во Тетово оствари победа со головите на Енур Тотре во 38.минута и на Љупчо Дориев во судиското продолжение. Тотре двојно проигра со Бесарт Ибраими и потоа со удар од 15 метри ја затресе мрежата на Струга ТЛ. Ибраими имаше одлична шанса во 82.минута, но Клисман Цаке спаси на гол-линијата, а Дориев со прецизен удар откосо од десната страна го постави конечниот резултат во 92.минута. 

Шкупи ја совлада Македонија ЃП со 3-1. Фатјон Јусуфи го отвори резултатот во корист на домаќинот во четвртата минута, а Сефер Емини израмни во 54.минута. Сепак, иако со играч помалку, поради исклучувањето на Илирид Адеми во 72.минута, Шкупи стигна до победа. Дембо Дарбо во 76.минута погоди за 2-1, а Дијак Ламине во судиското продолжение го потврди триумфот на тимот од Чаир. 

Борец и Ренова ремизираа 1-1 во Велес. Никола Радовиќ во 40.минута постигна гол за водство на Борец, а во финишот, во 89.минута Оливер Стоименовски несреќно постигна автогол за реми во Велес. 

Вчера, Работнички ја совлада Беласица со 2-0 со двата гола на Фахрудин Ѓурѓевиќ, а во петокот во Кратово, Силекс и Пелистер одиграа 2-2.            

ПРВА ЛИГА, 2.КОЛО 

АКАДЕМИЈА ПАНДЕВ – ВАРДАР 0-1

ШКЕНДИЈА – СТРУГА ТЛ 2-0

БОРЕЦ – РЕНОВА 1-1

ШКУПИ – МАКЕДОНИЈА ЃП 3-1

ВЧЕРА: РАБОТНИЧКИ – БЕЛАСИЦА 2-0

ПЕТОК: СИЛЕКС – ПЕЛИСТЕР 2-2

Табела: Силекс 4, Шкупи 4, Шкендија 4, Пелистер 4, Борец 4, Работнички 3, Вардар 3, Ренова 2, Струга ТЛ 1, Академија Пандев 0, Беласица 0. 

 

Advertisement
Advertisement
Advertisement

Facebook

Тимови