Фудбалскиот клуб Рома денес официјално го потврди именувањето на Џанпјеро Гасперини за нов предводник на првиот тим. Искусниот италијански стручњак потпиша договор со важност до летото 2028 година.
На тренерската позиција, Гасперини го наследува Клаудио Раниери, една од највлијателните фигури во историјата на италијанскиот фудбал, кој ја заврши својата последна тренерска мисија во клубот.
Во соопштението објавено на официјалната веб-страница на клубот се вели:
„Рома со задоволство објавува дека Џанпјеро Гасперини е новиот тренер на сениорскиот тим. Неговата богата кариера се одликува со иновативен пристап, силна работна етика и извонредна способност за развој на талентирани фудбалери. Сопствениците на клубот, во координација со Клаудио Раниери, уверени се дека токму Гасперини е вистинската личност која ќе го води тимот во новата ера. Добредојде, тренеру. Форца Рома.“
Гасперини зад себе има девет успешни сезони на кормилото на Аталанта, клуб со кој го оствари најуспешниот период во неговата историја. Под негово водство, тимот од Бергамо го освои трофејот во Лига Европа во 2024 година и обезбеди пет настапи во најелитното европско натпреварување – Лигата на шампионите.
Со ова ангажирање, Рома го започнува новиот проект под водство на стратег кој веќе има оставено силен печат во калчото, и чија мисија ќе биде да го врати клубот во самиот врв на италијанскиот и европскиот фудбал.
