Тренерот на Бенфика, Роџер Шмит, не мисли дека лошиот момент на Интер во Серија А ќе му даде предност на неговиот тим во четвртфиналните битки во Лигата на шампионите. „Нероаѕурите“ имаат само една победа во последните осум натпревари во сите натпреварувања, додека „орлите“ се во сосема поинаква атмосфера, со осум победи во низа.
„Противникот може да страда во нивниот шампионат, но тие имаат огромно искуство и класа. Очекувам Интер да биде исклучително мотивиран. Не се сомневам дека Италијанците ќе бидат подготвени за вечерашниот дуел исто како и ние“, изјави Шмит.
„Натпреварот е од клучно значење за двете екипи. Во оваа фаза од ЛШ, се соочувате само со многу силни тимови. Мислам дека знаеме што треба да направиме, а тоа е да се претставиме на највисоко можно ниво“, продолжи германскиот стратег.
„Нероаѕурите“ во последната рунда го елиминираа другиот португалски гигант кој оваа сезона стигна до елиминациската фаза, Порто.
„Секако дека ги гледав овие натпревари, но и не само нив. Интер е тим кој знае да игра офанзивно и добро да се брани. Нивниот стил е италијански, но знаат и да се менуваат. Затоа мора да бидеме подготвени на сѐ“, смета Шмит.
Бенфика ќе биде без искусниот дефанзивец Николас Отаменди, но Алекс Грималдо е целосно закрепнат и тренираше со тимот.
