Шкотскиот гигант Глазгов Ренџерс во неделата објави дека се разделува со тренерот Филип Клеман откако тимот забележа слаби резултати во последниот период.
„Клубот сака искрено да му се заблагодари на Филип Клеман за неговата посветеност и континуитетот што го покажа за време на престојот тука“, стои во официјалното соопштение на клубот за поранешниот тренер на Бриж и Монако.
50-годишниот Белгиец не успеа да ја задржи својата позиција по поразот од Сент Мирен со 0-2 во саботата, што дојде само две недели по елиминацијата од второлигашот Квинс Парк во шкотскиот Куп. Во првенството, Ренџерс заостанува 13 поени зад големиот ривал Селтик по 27 одиграни натпревари.
Клеман го наследи Мајкл Бил на клупата во октомври 2023 година, неколку месеци по неговото заминување од Монако, а два месеци подоцна ја освои Лига купот во Шкотска. Минатата сезона, Ренџерс долго беа во борба за титулата со Селтик, но на крајот попуштија и завршија на второто место.
