Доаѓањето на Давид Алаба во Реал Мадрид без обештетување се покажа како полн погодок за мадриѓаните кои сега планираат да направат нешто слично и следното лето со Килијан Мбапе. Но, претходно, уште во јануари би сакале да го договорат и пристигнувањето на уште еден играч кој на лето ќе биде слободен агент. Се работи за одличниот германски стопер Антонио Рудигер од Челси.
Рудигер има договор со Челси до претстојното лето, а не е ни блиску до договор за нов. Според англиските медиуми, германскиот репрезентативец бара 12 милиони евра по сезона, кои Челси нема намера да му ги понуди. Но, во играта сериозно се вклучи Реал Мадрид, а има конкуренција и од Баерн Минхен.
„Кралевите“ на сличен начин се договорија и со Давид Алаба. Трансферот беше договорен на 10 јануари минатата зима. Единствената разлика е што Баерн тогаш најави заминување на австрискиот дефанзивец, додека Челси се уште не се откажал од задржување на својот играч. Затоа „кралевите“ џентлеменски чекаат да почне зимскиот преоден рок.
