Реал Мадрид за 100 милиони евра го купува Џуд Белингем

Реал Мадрид би можел да направи еден од најголемите трансфери на клубот во зимскиот преоден рок кој започнува на 1 јануари, пишува „Марка“ во денешното издание. За трансферот на Џуд Белингем од Борусија Дортмунд во Реал се пишуваше уште од Мундијалот, но работите сега се забрзани.

„Реал го гледа Белингем како најважниот играч за својата иднина и сака да го доведе пред премногу клубови да бидат заинтересирани за него. Првиот план беше да го купат на лето, но работите се сменија и лесно е можно Белингем да пристигне во јануари во Мадрид“, пишува „Марка“.

Англискиот репрезентативец би чинел 100 милиони евра. Германците не му прават никакви проблеми околу трансферот и му рекоа дека може да го избере својот нареден клуб кој би ја платил отштетата.

Реал го сака Белингем бидејќи тој според Перез е клучен играч во новиот проект на Реал. Во Мадрид се свесни дека средниот ред на чело со Лука Модриќ е на залезот, а Белингем го гледаат како негов потенцијален наследник.

Белингем пристигна во Дортмунд летото 2020 година од Бирмингем за 25 милиони евра. Овој 19-годишен фудбалер брзо стана клучен играч на Борусија Дортмунд, за која има одиграно 112 натпревари и постигнато 19 голови и 21 асистенција.