Тренерот на Рома, Клаудио Раниери, беше задоволен од минималната победа со 1:0 на гостувањето кај Лече. Триумфот не дојде лесно за „волчицата“, а стратегот дури се пошегува дека им рекол на своите играчи по натпреварот дека ќе го одведат во гроб предвреме.
„Мораме секогаш да веруваме и да се бориме до самиот крај. Ова беше тежок натпревар, но тимот беше концентриран во текот на целото време. Промашивме две лесни шанси, а потоа наивно ја загубивме топката во нашата половина, што му даде голема можност на противникот. Во второто полувреме имаше повеќе борба, помалку острота, но најважно е што извојувавме победа против екипа што се бори за опстанок и може да биде многу опасна во овој дел од сезоната“, изјави Раниери.
„Уште на почетокот им кажав на фудбалерите дека треба да стигнеме до летото без да имаме за што да жалиме. Треба да се бориме во секој меч и за секоја топка. Ни остануваат уште осум натпревари, кои ќе бидат тешки, исто како овој денес. Мораме да ги прифатиме резултатите такви какви што ќе бидат“, додаде искусниот стратег.
73-годишниот тренер се пошегува и на прашањето дали е време да се пензионира и кој би можел да биде неговиот наследник на клупата на Рома.
„По натпреварот влегов во соблекувалната и ги прашав играчите дали сакаат предвреме да ме испратат во гроб. Среќа што неодамна ги направив сите тестови за срцето. Друг Раниери нема, па се надевам дека следниот тренер на Рома ќе биде некој помлад“, заврши Раниери.
