Рома во следното коло од италијанската Серија А ќе го пречека Комо, новиот прволигаш кој од клупата го предводи легендарниот играч од средниот ред, Цеск Фабрегас.
Тренерот на Рома, Клаудио Раниери, имаше само пофални зборови за Комо и Фабрегас, за кого верува дека во следните неколку години ќе стане еден од најдобрите тренери во Европа.
„Сигурен сум во тоа“, изјави Раниери.
Рома синоќа оствари убедлива победа од 4-0 против Монца на „Олимпико“. Меѓутоа, Раниери веќе ги насочи мислите кон следниот натпревар против Комо на Фабрегас, кој ќе се игра во недела.
Комо веќе ја победи Рома оваа сезона со 2-0 на домашен терен, а Раниери верува дека ќе имаат уште поголем мотив по неодамнешната серија на импресивни резултати.
Последниот успех во таа серија беше победата против Наполи со 2-1, која го чинеше Антонио Конте и неговиот тим првото место во Серија А.
Раниери не само што очекува тежок натпревар против Комо, туку е убеден и дека Фабрегас е на пат да стане еден од водечките тренери во светскиот фудбал.
„Веќе размислувам за Комо, тие нè победија, полни се со ентузијазам и играат одлично. Фабрегас за три или четири години ќе биде еден од најдобрите тренери во Европа, сигурен сум во тоа“, изјави Раниери за „Скај Спорт Италија“.
