Работнички сака да го сопре и Шкупи…„Ако играме како против Шкендија…“

Работнички ја сопре Шкендија, a забрзаниот ритам во Првата лига денеска (14 часот) му носи дуел со уште еден тим кој се бори за самиот врв на табелата. „Романтичарите“ му гостуваат на Шкупи, а составот на Александар Влахо размислува за позитивен резултат и за освојување бодови. Тоа го најавува талентираниот играч за врска Лука Станковски, кој израсна во еден од носителите на играта на Работнички.

„Мислам дека заслуживме и повеќе од бод против Шкендија. Бевме агресивни, одигравме напаѓачки, Шкендија не беше подобра во ниеден сегмент од фудбалската игра. И тоа ни дава мотив дека можеме да одиграме така квалитетно, би сакал да биде и за нијанса подобро, и на натпреварот против Шкупи. Јасно е, ни недостига единствено реализацијата за да оствариме триумф и против најдобрите. Се надевам дека ќе дојдат и головите на пресметката со Шкупи“, вели Луика Станковски.

Сепак, Шкупи има свои сметки и сака, ако е можно, уште повеќе да ја намали негативата во однос на лидерот Шкендија. Напаѓачот Региналдо е мотивиран да го постигне првиот гол во дресот на Шкупи, но приоритет сепак му е тимскиот триумф.  

„Би сакал да постигнам гол, тоа е целта на секој напаѓач, но, сепак, многу поважно е Шкупи да забележи нова победа. Од натпревар во натпревар се чувствувам се подобро, имав два месеци пауза без натпревари и полека влегувам во посакуваниот ритам. Живеам за голови и верувам дека тие набрзо ќе дојдат и во дресот на Шкупи“, изјави Региналдо.

Интересниот дуел ќе се одигра на комплексот на ФФМ, а ќе го суди Александар Ставрев.