Тренерот на Интер, Кристијан Киву, го изрази своето незадоволство од досудениот пенал во корист на Ливерпул во самиот финиш на натпреварот од Лигата на шампионите, кој заврши со минимален триумф 0-1 за „црвените“.
Во 87. минута, судијата Феликс Цвајер покажа пенал по преглед на ситуацијата со ВАР. Причината беше прекршок на Алесандро Бастони, кој го повлече дресот на Флоријан Вирц во шеснаесетникот, а Доминик Собослаи го реализираше досудениот удар.
„Ретко ги коментирам судиските одлуки. Говорам за почит и за тоа што треба да ги учиме луѓето, особено во Лигата на шампионите. Судијата беше во одлична позиција, ја виде целата ситуација и процени дека нема пенал“, изјави Киву.
„Кога ВАР се вмешува, мора да ја разбере динамиката на моментот. Должни сме да ги прифаќаме одлуките на арбитрите и да се учиме како да се справуваме со неправдата, да пристапуваме повнимателно кон вакви ситуации и да се фокусираме на добрите работи што можеме да ги направиме“, истакна стратегот на Интер.
