Работнички има нов тренер, Турчинот Алпарслан Ердем

Работнички доби ново тренерско решение. Клубот официјално го претстави Алпарслан Ердем како нов предводник на стручниот штаб, по разделбата со Бојан Маркоски која дојде поради слабите резултати на стартот од првенството.

Турскиот стратег не е непознато име за македонскиот фудбал, бидејќи минатата сезона го водеше Шкупи, што му овозможува добро познавање на конкурентите во лигата. Договорот со Работнички е склучен до крајот на тековната сезона, со можност за продолжување на соработката.

Минатата година „романтичарите“ под водство на Горан Станиќ завршија на третата позиција во првенството и обезбедија настап во квалификациите за Конференциската лига, а по неговото заминување на клупата на младата репрезентација (У21), тимот го презеде Бојан Маркоски.