Повеќе од 30.000 луѓе се собраа на „Ла Бомбонера“, легендарниот стадион на Бока Јуниорс, за да ја пречекаат новата ѕвезда на клубот. Единсон Кавани неодамна потпиша договор со аргентинскиот гигант, а синоќа беше претставен пред публиката која му посака добредојде во клубот.
Кавани, кој минатата сезона ја мина во шпанска Валенсија, пристигна во Бока како слободен играч и потпиша договор до крајот на декември 2024 година. Иако не е потврдено, се вели дека договорил плата од 2 милиони евра годишно.
Популарниот „Ел Матадор“ одигра 136 натпревари за репрезентацијата на Уругвај и постигна 58 гола, а во текот на кариерата го носеше и дресот на Данубио, Палермо, Наполи, ПСЖ и Манчестер Јунајтед. За ПСЖ постигна 200 гола, за Наполи 104, а во кариерата постигна повеќе од 400 гола.
Тој на презентацијата во Бока пристигна облечен во боите на клубот, а ќе игра во дресот со број „10“, што во Бока го носеа Диего Марадона и Хуан Роман Рикелме. Вториот сега е потпретседателот на клубот и е најзаслужен што Кавани дојде во Бока Јуниорс.
