Фудбалскиот клуб Порто официјално објави дека ја прекинува соработката со тренерот Бруно Витор по низата од три последовни порази во сите натпреварувања. Последниот пораз од Жил Висенте, кој значеше губење на лидерската позиција од Спортинг, ја натера управата на клубот да преземе радикален потег.
Бруно Витор, кој првпат во својата кариера беше главен тренер на „Драгао“, се соочи со сериозни критики поради загубеното лидерство и наводите дека ја изгубил довербата во соблекувалната. Најистакнат меѓу играчите што наводно се спротивставиле на Витор е искусниот Пепе, кој одбивал да игра под негово водство.
Витор за ситуацијата го обвини Пепе.
„Пепе не е опција затоа што тој сака така. Попрво би играл видео игри. Некои сакаат да бидат тука, други не толку“, изјави Бруно Витор.
Во медиумите се појави информација дека Пепе не го следел мечот против Жил Висенте, туку играл популарна видео игра „Counter-Strike“ на платформата „Face It“. Пепе остро ги демантираше овие обвинувања на социјалните мрежи, тврдејќи дека натпреварот го следел со своето семејство и го обвини Витор за „нечесни обвинувања“.
Оставката на Витор беше дочекана со задоволство од навивачите. Според извори блиски до клубот, се очекува нов тренер на Порто да биде Хорхе Кошта.
