Погледите кон Чаир: Шкупи и Ренова во битка за врвот

Шкупи и Ренова денеска (14 часот) ќе имаат жестока пресметка на Чаир, на отворањето на 11. коло во Првата фудбалска лига. Лидерот на табелата го пречекува второпласираниот тим на домашен терен, тоа дефинитивно е дерби на колото во македонскиот шампионат.

Шкупи по триумфот над Тиквеш (1-0) во Купот на Македонија, е подготвен за новиот предизвик. Тоа го потенцира и капитенот на тимот од Чаир, Фатих Исмаили.

„Ја пречекуваме Ренова на Чаир во многу важен натпревар. Подготвени сме да ги реализираме сите задачи што ќе ги зададе нашиот тренер Гоце Седлоски. Не сакам да потсетувам дека нашата цел се трите бода, бидејќи тоа е веќе познато, Шкупи се бори за титула оваа сезона. Се надевам дека и навивачите ќе дојдат и ќе не бодрат во голем број“, изјави Фатих Исмаили, пред мечот со Ренова.

Шкупи се наоѓа на врвот на табелата и има два бода предност пред второпласираната Ренова.

„Гипсарите“ доаѓаат малку „раздрмани“ по убедливиот пораз (5-0) од Шкендија во Купот на Македонија. Но, тренерот Ќатип Османи е уверен дека тимот ќе одговори на вистински начин.

„Ова е нов натпревар, фудбалерите се максимално мотивирани да прикажат добра игра и верувам дека не очекува еден интересен дерби натпревар на Чаир“, вели Османи.

Останатите натпревари од 11.коло ќе се одиграат утре, со почеток во 14 часот.