Дојде моментот да започне уште едно од врвните првенства во Европа – Серија А. На крајот на интересното трансфер лето, во кое голем број италијански екипи направија квалитетни состави, стартува новата сезона во италијанската елита, која ветува дека ќе биде максимално возбудлива. Ќе има и Македонија свои двајца претставници, Елиф Елмас во Наполи и Илија Несторовски во Удинезе.
По 11-годишна пауза, минатата сезона Милан повторно го освои „скудетото“. Ова беше изненадување за многумина, кои очекуваа пехарот да замине кај еден од другите два големи италијански гиганти – Интер или Јувентус. Сепак, „росонерите“ го продолжија подемот од претходните две сезони и им се спротивставија на прогнозите, освојувајќи ја шампионската титула.
Сега повторно не важат за главни фаворити за скудетото, но во тимот се уверени дека можат вторпат по ред да ги надминат сите други во ова натпреварување. Засега во тимот има само двајца нови играчи – напаѓачот Дивок Ориги и офанзивниот играч за врска Шарл Де Кетеларе, но до крајот речиси сигурно ќе дојдат уште неколку засилувања на „Сан Сиро“.
Градскиот ривал Интер е крајно мотивиран да се „реваншира“ и овојпат да слави со „скудетото“ на крајот од сезоната. Најголем дел од специјалистите и обложувалниците ги гледаат „нероаѕурите“ како најголеми фаворити за триумф во Серија А. Тимот дополнително ја засили конкуренцијата на својот состав, привлекувајќи играчи како Андре Онана, Хенрик Мхитарјан и Кристијан Аслани, но несомнено најголемо возбудување предизвика враќањето на напаѓачот Ромелу Лукаку, кој беше одличен во текот на неговиот претходен престој на „Џузепе Меаца“.
По првата „нулта сезона“ по многу години, Јувентус се уште се подготвува да се разбуди и да ја врати доминацијата што ја имаше во првенството во последната деценија. Имено, „старата дама“ важи за главен конкурент на Интер во битката за „скудетото“ во новата сезона. Клубот направи силна селекција, која им дава оптимизам на навивачите. Во Торино се врати некогашниот миленик на навивачите на тимот, Пол Погба, а воодушевување кај нив предизвика и уште еден докажан фудбалер, кој пристигна како слободен играч – Анхел Ди Марија.
Легендарниот централен дефанзивец Џорџо Киелини и Матијс де Лихт го напуштија Јуве, но дојде Бремер, кој беше прогласен за најдобар дефанзивец за минатата сезона во Серија А. Вчера беше објавено и најновото засилување – крилниот напаѓач Филип Костиќ од Ајнтрахт Франкфурт.
Највозбудливо беше трансфер летото за навивачите на Рома, кои се подготвуваат да завршат во топ 4 или дури да го освојат „скудетото“. Причина за зголемениот оптимизам кај навивачите на „волчицата“ е доаѓањето на Пауло Дибала, но и други врвни фудбалери како Немања Матиќ и Џорџинио Вајналдум. Составот на Жозе Мурињо дефинитивно изгледа посилен од ланскиот, што ги зголемува очекувањата.
Наполи се бореше за „скудетото“ речиси целата мината сезона, но сега тимот ризикува да испадне од топ 4. Само ова лето тројцата големи лидери во последните неколку години – Лоренцо Инсиње, Дрис Мертенс и Калиду Кулибали си заминаа од Неапол, а можна е разделба со уште еден важен играч – Фабијан Руиз. „Партенопеите“ го привлекоа големиот талент на Хвич Кварачкелија и вложуваат големи напори да го добијат и италијанскиот репрезентативец Џакомо Распадори, откако веќе се договорија со Џовани Симеоне.
Лацио и Фиорентина секогаш се дел од друштвото кое се надева дека може да се вмеша за Топ 4, а тука секако е и Аталанта.
