Во Сараево се одржа регионален состанок на фудбалските функционери од Југоисточна Европа, организиран од Фудбалскиот сојуз на Босна и Херцеговина. На настанот присуствуваа претседатели и генерални секретари од 12 европски фудбалски федерации, како и високи претставници на УЕФА, меѓу кои претседателот Александар Чеферин и директорот за национални асоцијации, Зоран Лаковиќ.
Фудбалската федерација на Македонија (ФФМ) ја претставуваа претседателот Масар Омерагиќ и генералниот секретар Дрилон Ганиу.
„Со федерациите од регионот делиме слични предизвици и затоа нашето учество на овие состаноци е значајно. Овие средби ни овозможуваат размена на искуства и дискусија за можни решенија. Разговаравме за различни прашања поврзани со националните првенства, стратешките цели, финансиските анализи и предизвиците во судењето. Особено нѐ радува поддршката што ја добиваме од УЕФА и претседателот Чеферин. Следниот состанок ќе го имаме на Конгресот на УЕФА во Белград и остануваме посветени на напредокот на македонскиот фудбал“, изјави Масар Омерагиќ.
Овие состаноци имаат за цел зајакнување на соработката меѓу фудбалските федерации од регионот и подобрување на фудбалските структури во Југоисточна Европа.
