Менаџерот на Нотингем Форест, Нуно Еспирито Санто, потпиша нов тригодишен договор со клубот. Тој ја презеде екипата во декември 2023 година, заменувајќи го Стив Купер. Во својата прва сезона успеа да го спаси Нотингем од испаѓање буквално во последното коло, а во изминатата година го одведе тимот до седмото место и прво учество во европските натпреварувања од сезоната 1995/96.
„Среќен сум што можеме да го продолжиме нашето патување во овој фантастичен фудбалски клуб“, изјави Нуно. „Откако пристигнавме во Форест, работевме неуморно за да изградиме посебна врска меѓу играчите, навивачите и сите во клубот, што ни помогна да постигнеме одлични резултати минатата сезона.“
„Нуно има големо влијание откако е тука. Покажа дека знае како да го извлече максимумот од играчите и е експерт во нивниот развој, а истовремено успешно ги вградува нашите млади таленти во првиот тим. Имаме силна и стабилна релација и, најважно, ја делиме истата визија и амбиција – да испишеме нова историја за Нотингем Форест, да бидеме конкурентни и во Премиер лигата и во Европа, и да освоиме трофеи за овој голем клуб“, додаде сопственикот на Нотингем Форест, Евангелос Маринакис.
