Англискиот премиерлигаш Челси и понатаму се соочува со голема неизвесност, тврдат британските медиуми. Се уште не е јасно дали преземањето на клубот од „Стемфорд бриџ“ од американските сопственици за речиси 5 милијарди евра ќе се случи навреме.
Клубот објави дека продажбата е договорена, но, како што пренесува „Скај њуз“, неизвесно е дали целата зделка ќе биде извршена во предвидениот рок.
Британската влада бара од Роман Абрамович сертификат каде по продажбата ќе завршат околу 3 милијарди евра. Рускиот сопственик ги дал своите гаранции, но англиските власти не се сигурни во тоа и сега продажбата се одложува.
Најголем проблем е што клубот мора да добие нови сопственици до крајот на мај, во спротивно нема да добие лиценца и ќе биде исфрлен од Премиер – лигата.
