Селекторот на германската фудбалска репрезентација, Џулијан Нагелсман, не го криеше разочарувањето по поразот од Португалија со 1-2 во полуфиналето на Лигата на нациите. Тој истакна дека ова бил еден од најслабите натпревари на неговиот тим во последните година и половина.
„Ова беше еден од нашите најлоши настапи во последните 12 до 18 месеци. Ни недостасуваше агресија, интензитет, а дел од играчите не беа доволно активни во нападот. Ни требаше секој да даде 100%, но тоа не се случи. Португалија напаѓаше со шест или седум играчи, а ние се мачевме“, изјави Нагелсман.
Тој додаде дека клучот за поразот бил во првото полувреме.
„Првото полувреме беше решавачко. Имавме повеќе простор, но не бевме доволно остри. Бевме бавни, со грешки во клучните моменти. Се создадоа четири шанси, но не беа доволно чисти. Иако не им дозволивме многу на Португалците, тие беа поефикасни.“
Германија успеа да поведе во второто полувреме, но потоа прими два гола и беше елиминирана.
„Поведовме заслужено, но наместо да добиеме самодоверба, ние престанавме да играме со исто темпо. Се опуштивме и тоа нѐ чинеше финале. Тешко е да се признае, но не заслуживме да бидеме финалисти“, додаде германскиот селектор.
И покрај разочарувањето, Нагелсман останува оптимист.
„Ова е и болка, но и дел од патот напред. Имаме млад состав и ќе има грешки. Важно е да учиме од нив – само така ќе напредуваме“, заклучи тој.
