Фудбалската репрезентација на Македонија в петок ги продолжува квалификациите за Светското првенство во Катар. Противник на националниот тим е Лихтенштајн, а дефанзивецот Висар Муслиу верува дека Македонија ќе слави во Вадуц.
„Знаеме колку е важен овој натпревар против Лихтенштајн, за враќање на победничката атмосфера и за продолжување на надежите за пласман на СП во Катар. Ги знаеме квалитетите на Лихтенштајн, сме играле и претходно во Вадуц и јасно е дека ќе мора да ја подобриме реализацијата, но исто така и одбраната да биде на потребното ниво. Верувам дека ако ги следиме инструкциите на селекторот Милевски, ќе успееме да го неутрализираме ривалот и да славиме победа“, изјави Висар Муслиу пред денешниот тренинг.
