Зад Висар Муслиу се две европски првенства. Беше дел од сениорскиот самит ова лето, но и во 2017 со младата селекција до 21 година, кога предводник беше Благоја Милевски. Сега тој ја презеде палката на А-тимот, а Муслиу вели дека нема да има никаков проблем сите брзо да се прилагодат на новиот селектор.
„Среќен сум што сум дел од А-репрезентацијата и по Европското првенство. Сега имаме нов селектор, но најголемиот дел од нас добро се познаваме уште од У-21. Мислам дека брзо ќе бидеме во полн ритам. Не очекува првиот натпревар со Ерменија, селекција со која често игравме во изминатиот период, ги знаеме нивните добри и лоши страни, ќе видиме што ќе ни укаже и селекторот и се надеваме на успех“, изјави Висар Муслиу.
Македонската фудбалска репрезентација денеска на компкексот „Петар Милошевски“ во ФФМ го одржа првиот тренинг на кој не беа присутни единствено Елиф Елмас и Адис Јаховиќ.
