Тренерот на Рома, Жозе Мурињо за првпат ќе се врати на „Џузепе Меаца“ да го предводи тимот на гостување против Интер, на стадионот на кој освои тројна круна во сезоната 2009/2010.
По турбулентниот викенд, Рома вечерва ќе игра против Интер во четвртфиналето на Купот на Италија, а на трибините на познатиот стадион во Милано ќе се најде и легендарниот пртетседател Масимо Морати кој беше на кормилото на Интер во тој период.
„Не би го пропуштил враќањето на Мурињо во Милано за ништо на светот! Ќе му биде чудно да гледа како оди во гостинската соблекувална“, изјави Морати.
Мурињо потоа замина во Реал Мадрид и не присуствуваше на церемонијата на прославата на освојувањето на Лигата на шампионите. Морати не го обвинува, знаејќи дека Португалецот веќе се согласил да се пресели во Мадрид.
„Вечеравме неколку дена подоцна и тој ми разјасни се. Беше многу емотивен бидејќи беше приврзан за Интер“, открива Морати.
