Жозе Мурињо, еден од најистакнатите фудбалски тренери во изминатите две децении, гостуваше во подкастот на неговиот поранешен играч, Џон Оби Микел, каде што одговори на неколку интересни прашања. Едно од нив беше кој, според него, е најдобриот тренер во светот.
Микел претпостави дека Мурињо ќе избере меѓу Сер Алекс Фергусон и Пеп Гвардиола и директно му го постави тоа прашање.
„Фергусон или Пеп? Не можете да ги споредувате. Тоа се различни генерации и различни фудбалски пристапи. За Премиер – лигата, двајцата се легендарни, но според мене, најголемата фигура во историјата на лигата е Клаудио Раниери. Тој стана шампион со Лестер, што беше најневеројатниот момент во историјата на Премиерлигата“, изјави Мурињо.
„Освојувањето повеќе трофеи со Манчестер јунајтед или Манчестер сити е импресивно, но тоа што Раниери го направи со Лестер е нешто што не може да се спореди. Тоа е најголемото освојување на лига што сум го видел во мојот живот“, истакна Португалецот.
