По трилерот против ПСЖ и Челси, Реал Мадрид успеа да приреди нов спектакл и со неверојатен пресврт против Манчестер Сити обезбеди финале во Лигата на шампионите.
Кога се чинеше дека се е загубено, Родриго со два гола во финишот од мечот обезбеди продолженија, а потоа Карим Бензема од пенал донесе победа и пласман во финалето.
Огромни заслуги одат во адреса на тренерот Карло Анчелоти, кој покажа дека е мајстор во својот занает и по подвигот за викендот кога стана првиот тренер кој освоил титули во сите „пет лиги“, стана првиот стручњак и со пет финалиња во Лигата на шампионите.
Вечер за паметење има и Родриго, кој стана првиот играч со два гола во 90. минута во нокаут натпреварите од Лигата на шампионите, а оваа вечер ќе ја памети и Бензема, кој го израмни рекордот на Кристијано Роналдо од сезоната 2016/2017, достигнувајќи 10. голи во елиминациската фаза на ова натпреварување.
Реал Мадрид ќе игра против Ливерпул во финалето на 28. мај на „Стад де Франс“ во Париз.
