Интер Мајами не успеа да ја отвори новата сезона во американската МЛС лига со победа, откако одигра драматично 2-2 на домашен терен против Њујорк Сити.
Новоназначениот тренер Хавиер Маскерано, во стартниот состав ги вклучи сите четири големи ѕвезди – Жорди Алба, Серхио Бускетс, Лионел Меси и Луис Суарез.
Домаќините од Мајами започнаа одлично и поведоа уште во петтата минута со гол на Томас Авилес. Сепак, истиот фудбалер набрзо стана трагичар, откако во 23. минута заработи директен црвен картон.
Со играч повеќе, Њујорк Сити направи целосен пресврт. Гостите израмнија уште пред полувремето со гол на Митја Иленич во 26. минута, а во 55. минута Алонсо Мартинез погоди за водство од 1-2.
Се чинеше дека шампионите на Источната конференција од минатата сезона ќе започнат со пораз, но во 100. минута Лионел Меси асистираше за 21-годишниот Венецуелец Теласко Сеговија, кој донесе бод за Мајами.
Возбудувањата не завршија тука – само четири минути подоцна, Меси доби жолт картон, но избегна исклучување.
Клубот на Дејвид Бекам минатата сезона доминираше во Источната конференција, но беше елиминиран уште во првата рунда од плејофот. Оваа сезона, амбициите се многу поголеми.
