Аргентинскиот медиум „Кларин“ смета дека Златко Далиќ ја повторил грешката на Луј ван Гал во пресрет на вечерашниот полуфинален натпревар меѓу Хрватска и Аргентина на Светското првенство. Медумот ги цитирал комплиментите на Далиќ до Лионел Меси, но и забелешката дека аргентинскиот капитен не учествува премногу во дефанзивната игра.
„Тој не трча многу, едноставно не трча по топката. Ја чека топката со сета своја сила и енергија. Не учествува во одбраната и не смееме да дозволиме да ја прими топката бидејќи тогаш прави најголема штета со оглед на тоа дека е најдобриот играч во светот во последните 10 години“, изјави Далиќ на вчерашната прес-конференција.
Аргентинците овие изјави ги споредија со критиките кои наводно ги користел Луј ван Гал за да го вознемири Меси. На крајот од натпреварот помеѓу Аргентина и Холандија дојде до конфликт, па некои аргентински фудбалери имаа што да му кажат на поранешниот селектор на Холандија.
„Кларин“ тврди дека Меси и сега ќе биде максимално мотивиран по овие зборови на Златко Далиќ.
