Серија А и фудбалските клубови во Италија се соочуваат со финансиски колапс и им е потребна државна помош, изјави Џузепе Марота. Тој исто така рече дека ограничувањето на бројот на гледачи на 5.000 гледачи по натпревар воопшто не помага.
„Серија А и италијанскиот фудбал како целина се соочуваат со неликвидност. Владата и државните структури не можат да продолжат да не игнорираат. Бевме на работ на колапс дури и пред да започне пандемијата пред две години“, истакна Марота.
Клубовите негодуваат за одлуката натпреварите во Серија А да се играат само пред 5.000 гледачи како мерка за безбедност против коронавирусот.
„Отворените објекти се безбедни кога се користат маски и сертификати и има капацитет до 50 отсто. Докажавме колку се грижиме за безбедноста, а сега повторно ги ограничуваме сите клубови на 5.000 луѓе по натпревар. Тоа е бесмислено. Ако Франција може да игра пред полни стадиони, воопшто нема промени ниту во Англија, зарем не е бесмислено во Италија фудбалот да продолжи да се игра пред толку ограничен број навивачи?“, праша директорот на Интер.
