Манчестер Јунајтед нема да се откаже од идејата да привлече офанзивен фудбалер во јануари. Прв на листата на менаџерот Ерик тен Хаг беше неговиот сонародник Коди Гакпо, но тој изненадувачки брзо потпиша за Ливерпул.
Според неколку шпански медиуми, раководството на „црвените ѓаволи“ го насочиле кон Марко Асенсио. Крилниот напаѓач на Реал Мадрид ретко е во стартниот тим од почетокот на сезоната и не е јасно дали ќе го продолжи договорот на лето.
Асенсио од 1 јануари ќе може да преговара со други клубови, а на „Сантијаго Бернабеу“ не би имале против да ги слушнат можните понуди за него, за да не замине бесплатно по завршувањето на сезоната.
Манчестер Јунајтед веќе знае дека шпанскиот репрезентативец нема да чини премногу пари и подготвува понуда.
