Фудбалската репрезентација на Македонија во Торшавн (15 часот) денеска го стартува новото издание во Лигата на нации, а противник е селекцијата на Фарски Острови. На терен со вештачка трева и со очекувања дека овој меч мора да се добие, најдобрите македонски фудбалери одат на мегдан на тимот на Фарски Острови, кој веќе неколку години не е тотален аутсајдер во европскиот фудбал.
„Првиот натпревар е секогаш е тежок. Фарски Острови е квалитетен, дисциплиниран противник и имаме максимална почит кон нив. Сепак, наша цел е прво место во групата на Лигата на нации. Треба да бидеме на својот максимум за да не зависиме од играта на противникот. Во минатото издание на Лигата на нации, Фарски Острови ја победија Турција, а тоа не е мала работа“, вели селекторот Благоја Милевски.
„Временските услови се такви какви што се. Не е лесно да се адаптирате од 35 на десетина степени. Затоа дојдовме ден порано. Мислам дека ќе се прилагодиме на сите услови и ќе го наметнеме нашиот квалитет. Противникот е добро организиран, дисциплиниран и мора да бидеме на исто ниво и подобри што се однесува до динамиката на игра, агресивноста и желбата, за да дојде нашиот индивидуален квалитет до израз. На овој собир гледам одлична енергија и тоа треба да го пренесеме на терен“, порача селекторот, најавувајќи дека очекува триумф.
Капитенот Енис Барди истакнува дека атмосферата во репрезентацијата на Македонија е одлична и дека тоа треба да донесе позитивен резултат на денешниот дуел.
„Сите сме свесни што ни следи и направивме детална анализа за овој натпревар. Атмосферата секогаш е добра кога се игра за Македонија и можеби на овој собир имаме најдобра клима. Имаме одлични играчи, кои потпишаа за големи клубови како Димитриевски, Елмас, Миовски и од нив очекуваме многу. Не треба да бараме алиби и како и секогаш да бидеме максимално фокусирани на нашата игра. Не треба да ни недостасува желба и треба да излеземе просторот кој противникот ќе ни го понуди да го искористиме“, изјави Енис Барди.
