Бразилскиот напаѓач Роберто Фирмино дојде во Ливерпул во 2015 година од Хофенхајм и стана дел од „пеколното“ трио Салах-Мане-Фирмино, кое на „црвените“ им донесе многу радости и трофеи во Премиер – лигата и во Лигата на шампионите.
За среќа на Ливерпул, но и на несреќа на Фирмино, Јирген Клоп го засили тимот со двајца офанзивци, пристигнаа Диего Жота и Луис Дијаз, што значеше дека харизматичниот Бразилец полека ја губи довербата кај менаџерот и се повеќе време поминува на клупата.
Поради ова, останувањето на 30-годишниот фудбалер на „Енфилд“ е доведено во прашање, но според информациите од Англија, Ливерпул планира да му го продолжи договорот.
Раководството на клубот има намера да ја продолжи соработката со Фирмино, иако веќе нема толкаво влијание врз тимот. Договорот со бразилскиот напаѓач истекува следната година.
Фирмино одигра 320 натпревари за клубот, постигна 98 гола и забележа 73 асистенции.
