Хрватскиот првак Динамо Загреб оствари триумф (3-1) над „Максимир“ и му се реваншираше на Рапид Виена за поразот во Австрија. Иако гостите поведоа преку Кнасмулнер во осмата минута, израмни Бруно Петковиќ само четири минути подоцна, а Комнен Андриќ донесе и водство пред одморот. Во вториот дел, Јосип Шутало го потврди триумфот, а Стефан Ристовски влезе во игра две минути пред крајот на мечот.
Црвена Звезда загуби дома (0-1) од Митјиланд. „Црвено-белите“ од 12.минута играа со фудбалер помалку, а го завршија со деветмина. Исклучени беа Дегенек и Гобељиќ, а Гејлор Канга во 56.минута си постигна автогол сакајќи да блокира по слободниот удар на гостите.
Баер Леверкузен со 4-0 го совлада Бетис, а Фенербахче славеше со 0-3 на гости кај Антверпен. Селтик го победи Ференцварош на гости со 2-3, а Лестер и Спартак Москва одиграа 1-1.
