Манчестер Сити го пречекува Ливерпул во дербито на колото во Премиер – лигата. Натпреварот има поинаков контекст во споредба со последните години, кога двата тима се бореа за титулата. „Црвените“ ќе се обидат да ја зголемат предноста на врвот по поразот на Арсенал, додека „граѓаните“ се борат за место во топ 4. Тие ја задржаа четвртата позиција, бидејќи Борнмут и Челси, кои се зад нив, загубија.
По серијата негативни резултати, тимот на Пеп Гвардиола ја стабилизираше својата форма во лигата, со исклучок на тешкиот пораз од Арсенал на почетокот на месецот. Минатата недела, Манчестер Сити одигра еден од најдобрите натпревари во последно време, совладувајќи го Њукасл со 4-0. Сепак, ова беше проследено со елиминација од Реал Мадрид во Лигата на шампионите. Поразот сам по себе не беше толку загрижувачки, колку фактот што „граѓаните“ беа целосно надиграни.
Главната неизвесност пред дербито е поврзана со Ерлинг Хaланд, кој е под знак прашалник за натпреварот. Тој се повреди против Њукасл и го пропушти дуелот во Мадрид.
Сити е различен тим без Норвежанецот, иако Омар Мармуш постигна хет-трик против „чавките“ и на него ќе се смета доколку Халанд не биде подготвен. Гвардиола нема да може да смета и на Мануел Аканџи и Џон Стоунс. Против Реал, тој го искористи Хусанов на десната бековска позиција, иако зимското засилување не се чувствува најкомфорно таму.
Во последните години, пресметките меѓу Манчестер Сити и Ливерпул се претворија во класика со често менување на надмоќта. Последниот дуел меѓу овие ривали се одигра на почетокот на декември, кога Ливерпул славеше со 2-0, а можеше да победи и со уште поголема разлика.
